Plantun de Prouvènço

Pèr coumpara dos planto d'encò nostre

Galega orientalis & Festuca laevigata

Lavanèso(-dóu-levant)

Galega orientalis

Fabaceae Leguminosae

Autre noum : Avanèso(-dóu-levant).

Nom en français : Galéga d'Orient.

Descripcioun :
La lavanèso-dóu-levant se pòu trouba, raramen cultivado, dins d'ùni champ de noste relarg. Nous vèn dóu Caucase ounte trachis naturalamen. Coume sa cousino, Galega officinalis, sèmblo uno vèsso, mai li fuioun soun en noumbre impar e sènso vediho. Li flour soun d'un blu founs e la planto a quàsi ges de péu.

Usanço :
Es uno planto cultivado pèr lou fen, proun richo en prouteino (porto de noudule racinàri emé Rhizobium galegae que fisso lou diazoute de l'èr). Au contro de la lavanèso, la planto èi pas empouisounanto, pamens suporto pas la secaresso.

Port : Grando erbo
Taio : 40 à 200 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Galega
Famiho : Fabaceae
Famiho classico : Leguminosae

Ordre : Fabales

Coulour de la flour : Bluio
Petalo : irreguliero
Ø (o loungour) flour : 10 à 16 mm
Flourido : Printèms - Estiéu

Sòu : Ca
Autour basso e auto : 0 à 1200 m
Aparado : Noun
Remarco : Planto cultivado
Mai à avoust

Liò : Champ
Estànci : Mesoumediterran à Coulinen
Couroulougi : Óurigino Éuropo-Èst
Ref. sc. : Galega orientalis Lam., 1788

Petugo(-giblado)

Festuca laevigata

Poaceae Graminaceae

Nom en français : Fétuque courbée.

Descripcioun :
Aquesto petugo trachis en mato dins li tepiero seco, roucaio e esboudèu de mountagno, subretout sus lis adré secarous e cauquié. Es uno planto chanchadisso mai pulèu grando emé uno paniculo de 6 à 13 cm de long. Lis espigueto longo de 9 à 11 mm caupon 4 à 5 flour. Li lemma soun longo de 6 à 7,5 mm e porton uno arèsto de mai de 2,5 mm (-> 3,5 mm). Pèr ço que toco li coupo dóu limbe de la fueio, l'esclerenchime èi prim e pulèu de countùni. Apoundèn que la lengueto (ligulo) èi courteto e que lis espalo de la guèno soun ciliado.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.